Setu deuet Ar Priñs Bihan en-dro !

Levenez vras eo adkavout — e brezhoneg ar wech-mañ — ar boulomig souezhus-se a oar gwelout un dañvad a-dreuz speurenn goat ur c'hased, ha dizoleiñ e kreiz ar gouelec'h, ur puñs heñvel ouzh hini ur gêriadenn.

Evel ar Priñs Bihan, e vagomp mignoniezh ouzh louarn bihan ar gouelec'h, ha fromet omp zoken gant ar rozenn lorc'hus, daoust d'he froudennoù. Met ken kaer eo !

Prest omp da heuliañ  ar Priñs Bihan en e veaj a blanedenn da blanedenn ha da respont d'e c'houlenn : "Me ho ped, tres din un dañvad", daoust ma n'omp ket gwall varrek war an tresañ. Ar Priñs Bihan a gompreno.